काठमाडौं । एसीसी इमर्जिङ टिम्स एसिया कप क्रिकेट प्रतियोगितामा नेपालले संयुक्त अरब इमिरेट्स (युएई)को ‘ए’ टोलीलाई ३ विकेटले पराजित गरेको छ । श्रीलङ्काको कोलम्बोस्थित पि सारा ओभल क्रिकेट मैदानमा आज भएको खेलमा युएईले दिएको १६८ रनको लक्ष्यलाई नेपालले २३ ओभरमा ७ विकेट गुमाउँदै पूरा गर्‍यो । नेपालका लागि कुशल भुर्तेलले सर्वाधिक ७१ रनको योगदान दिए । ४३ बल खेलेका उनले आफ्नो पारीमा ९ चौका र ४ छक्का प्रहार गरे ।  त्यसैगरी देव खनाल र सन्दीप जोराले समान २४ रनको योगदान दिए । गुल्सन झाले ११ रन जोडे । कप्तान रोहित पौडेलले ९ रन जोडे भने प्रतिश जिसिले अविजित ८ रन बनाए । कुशल मल्ल २ रनमा अविजित रहे । बलिङतर्फ युएईका मोहम्मद फाराजुदिन एक्लैले ५ विकेट लिए भने मुहम्मद जवादुल्लाहले दुई विकेट लिए । त्यसअघि टस जितेर पहिले ब्याटिङ गरेको युएईले ४४ ओभरमा सबै विकेट गुमाउँदै १५७ रनको योगफल बनाएको थियो । युएईका लागि लभप्रित सिंहले ८२ बलमा ६ चौका र १ छक्काको मद्दतमा ५२ रनको योगदान दिए । त्यस्तै इथान डी सोजाले १८ रन बनाउँदा अस्वस्था भलथापाले १६ तथा आरयान्स शर्माले १४ रन बनाएका थिए । बलिङतर्फ नेपालका लागि कुशल भुर्तेल एक्लैले ६ विकेट लिए भने श्याम ढकालले २ विकेट झारे । कुशल मल्ल र पवन सर्राफको नाममा १/१ विकेट रह्यो । आजको खेल जिते पनि नेपाल प्रतियोगिताबाट बाहिरिसकेको छ । नेपालसँगै युएईको ‘ए’ टोली प्रतियोगिताबाट बाहिरिसकेको छ । नेपाल प्रतियोगिताको आफ्नो पहिलो खेलमा पाकिस्तान ‘ए’ सँग ४ विकेटले पराजित भएको थियो भने दोस्रो खेलमा भारत ‘ए’ सँग ९ विकेटले पराजित भएको थियो ।